Blanke auge på julaftan

I fjor fekk eg ei gåve som fekk meg til å smile frå øyre til øyre, og som gjorde auga mine blanke. Gåva bestod av åtte små gåvekort med aktivitetar som eg og mi beste venninne kunne gjere saman. Eg kunne ikkje ønska meg noko betre!

I følgje Aftenposten vil kvar enkelt person i snitt bruke 5622 kroner på julegåver i år. Slår vi dette beløpet saman med resten av julebudsjettet, som julemat og pynt, kjem vi opp i ein sum på svimlande 10 700 kroner. Det er mykje pengar. Samstundes sit vi der på julaftan i ein haug av klede, og fullt av duppedingsar og ting vi kanskje ikkje treng.

Nordmenn blir litt ekstra generøse når jula kjem. Vi brukar faktisk dobbelt så mykje pengar på julegåver som svenskane gjer. Nordmenn har god økonomi, og når det då attpåtil kjem lokkande tilbod som «Black Friday» endar vi kanskje opp med å kjøpe ei dyr klokke eller ein genser, berre fordi det var 30% rabatt på det. Vi lever i eit forbrukarsamfunn. Vi får ting og klede både til jul og bursdag, og i tillegg kjøper vi ein heil del sjølv. Går noko sundt er det lettare å kaste det og kjøpe nytt, enn det er å reparere det.

Eg trur ikkje vi er så kravstore som vi kanskje framstår. Lommeboka treng ikkje svi etter julehandelen. Klesskapet treng ikkje flyte over av jakker og sko du ikkje brukar. Alternative julegåver gler minst like mykje som materielle, om ikkje meir. Ei gåve treng ikkje vere kjøpt for fleire hundre kroner for å vere fin. Ein treng ikkje kjøpe ting ein ikkje trur vert brukt, berre fordi ein ikkje kjem på noko betre!

Aktivitetar og opplevingar er flotte julegåver til familie, vener og kjende, og noko eg vil anbefale varmt. Heimelaga gåvekort, eller aktivitetskort kan du fylle med nesten kva som helst. Berre ta utgangspunkt i kva personen likar, eller kva som hadde vore hyggeleg å gjere saman. Kanskje kino, konsert eller teater? Var du kjapp klarte du kanskje å skaffe billettar til Vinjerock, eller du kan invitere med nokon på Trollrock? Det arrangerast kurs i til dømes smiing, lafting og måling på Valdresmuseea, og det finnes skikurs, golfkurs og dansekurs.

Kva med å lage noko sjølv? Strikke sokkar, vottar eller ein genser? Sjølv malar eg ein del. Er du ikkje så glad i å male er kanskje fotoalbum tingen? Gåver som kan etast opp er óg fine! Kanskje kan du lage julekaker, karamellar eller brente mandlar. Kanskje fell eit gåvekort på brød frå Bakeriet i Bagn i smak? Eller kva med ei teneste? Svært få ville blitt lei seg for eit gåvekort på kjøkkenvask, barnepass eller snømåking. Du kan óg gje ei symbolsk gåve der pengane går til nokon som faktisk treng det, nødhjelp, skulegang eller ei geit til ein familie i Afrika. Det finst mange moglegheiter.

I fjor fekk venninna mi, som er veldig glad i sjokolade, - eit gåvekort på sjokoladesmaking! Slike gåver gir ikkje glede berre på julaftan, men og etterpå, når vi får enno fleire gode minner saman. Og det er vel det vi alle ynskjer; å gi ei gåve som treff rett i hjartet til den vi er glad i, som viser at vi har lagt energi og krefter i å finne ut kva som kan glede ei venninne, søster, far eller kjæraste.

God jul!

Publisert i Valdresmagasinet 10.12.16